وداعا

عفوا لم يعد لك مكانا فى حياتى لانك ببساطة كل حياتى

وداعا حياتى

شكلك فاهم يا نصة

الخيار الخيار الخيار اخضر .... سلطة ... مخلل

بس عيب اية دا هنا بوست محترم غنوا بصوت واطى وكل واحد يلتزم بالمطبخ بتاعة لو سمحتوا

وبما انى انا كان اخر اللى وصلنى من اغانى السفرة دى اغنية عنتليب مصر العنب العنب فا تبسط والله لما لقيتهم افتكروا الخيار يعنى هو ابن البطة السودة

وبعدين قعدت افكر بقى ودا مش كتيير يعنى وافتكر الكلام الى اتقال ايام اغانى العنب والسمك والوجبات الشهية دا عن انحطاط المغنى وضياعالطرب الاصيل والاسفاف والاستخفاف بعقول المواطنيين الى هما احنا يعنى

وفين ام كلثوم وفين عبد الحليم وفوزى وفيروز

وهاتك يا شتيمة ف بعرور وامثالة

النهاردة بقى انا اكتشفت ان الراجل دا عندة حق والله ولو غنى لاحاجة تانية غير الاكل والخضار يبقى غبى وساقط

زمان كانوا بيغنوا للحب للحبيب للورد للقمر عشان كانوا حاسسين الحاجات دى ولامسنها

غنوا لمصر عشان كان فية مصر

كانوا ناس فاضية امورهم تمام واخر روقااان يغنوا براحتهم لا شيلين هم اكل ولا شرب ولا شغل

ولا جواز كانوا عايشين للمغنى والسميعة كمان كانوا رايقييين ومعندهمش تمن مشاكلنا يستمتعوا بالغنى ويتمزجوا ومالة

انما احنا بقى نغنى للحاجات دى بمناسبة اية بمناسبة الدنيا البمبى اللى احنا عايشينها يعنى

على الاقل بعرور وغيرة فهموا الشعب دلوقتى اية اكتر حاجة بتهمة الاكل ثم الاكل ثم الاكل

الناس مش لاقية تاكل دلوقت اكييد هايتبسطوا لما حد يغنى للاكل اهو يديهم احساس انة لسة موجود

شفتوا ازاى ان بعرور طلع بيفهم عننا كلنا وغنى على الوتر الحساس بتاع السبعين مليون اللى تحت خط الصفر

واكييد لو طلع بهلول بكرة يغنى وغنى للزلط ف مصر منى لية اديلة جايزة نوبل اى والله

تحياتى لبعرور

ريشة فى الهوا

فى الظلام تسقط وحيدة

ربما لم يشعر بها احد

ربما شعر فلم يكترث كثيرا

فهى واحدة ضمن الاف يتساقطون يوميا

كل هذا لا جدوى منة فهى الان ف طريقها الى اسفل

لن يعيق هذة الرحلة شىء غير بعض الرياح التى تحملها من مكان الى مكان

ينتابها خوف ورهبة من هذا الظلام و قوة الرياح ومن ملمس اوراق الشجر

تبحث عن ملجاء بين فروع الاشجار لكن الرياح لا تعطيها فرصة كى تلتقط انفاسها

كأنها عزمت على حملها الى الابد

تحلم باللحظة التى تصل فيها الى الارض

تحاول ان تسرع لتصل

لتستريح

لتبتعد عن تلاعب الرياح بها

لتبتعد عن ايدى الاوراق التى تتشبث بها

تسرح باحلامها بعيدة

تتخيل نهاية متاعبها عندما تصل الى الارض

على الارض يوجد الهدوء والراحة

على الارض سوف تحظى بالسكينة

على الارض سوف تتخلص من الاعيب الرياح

وعندما تهدأ الرياح

يقترب موعد تحقيق حلمها

ويقترب

ويقترب

وتبدا رحلتها الى اسفل

وتبتسم لاول مرة منذ سقوطها

فقد ان اوان الراحة

وعندما يلمس جسدها الضعيف الارض

تضحك بقوة لقد انتهت كل متاعبها الان

ولكنها لم تعلم ان الارض ليست نهاية فقط لحيرتها فى الهواء

ولكنها نهاية لها شخصيا

بعد ان تطئها اقدام المارة والسيارات

لتسكن حركتها الى الابد

وقتها فقط تمنت لو تمسكت الرياح بها اكثر من ذلك

مجرد احساس

المنظر دا شدنى اوى مش عارف لية

مع انها ممكن زى باقى الصور بحر واصداف وسما بس دى فيها حاجات حاساها اسبيشيال

عارفين انا حسيت بكل احساس حستة الصدفة وهى فى مكانها دا

حسيت بوحدتها بين امواج البحر وفقدنها لحبايبها وحنينها لحضنهم

حسيت بخوفها من الموج ليسحبها لمكان مش تعرفة ولا تعرفلة نهاية

وخوفها لا تختفى وسط الرمال وينطفى جمالها

ومع كدا هى حاسة بهدوء جمييل وسكينة وراحة بااال الشط كلة ملكها وهى بس سيدة قرار نفسها الوحدة حلوة احيانا

عارفة انها بيجيلها لحظات تحس بالغرور وان مفيش حد ينافسها ولا يقف ادامها على الشاطىء وان البحر كلة ملكها

وانها ملكة متوجة على امواجة اللى بتحضنها بدفء كل لحظة متهايالى انها بتعشق البحر مع انها بتخاف تتوة فية

مشاعر كتييير جواها متلخبطة محيراها ومش مخليها ترسى على بر ولا تعرف هى عايزة اية ولا مرتاحة لاية اكتر من اية ولا اية هايفرحها واية هايبكيها بس اللى انا متاكدة منة ان خوفها الاكبر والاحساس الوحيد اللى بتخاف حتى انها تفكر فية لانة ممكن يقضى عليها ان يجى شخص ويشيلها من مكانها لانة شايف انها ممكن تكون

لعبة حلوة فى سلسلة مفاتيحة وحرام تختفى وسط الرمال او يبلعها الموج

ويحرمها من كل الاحاسيس دى ويبقى الاحساس الوحيد جواها انها سجينة

احاسسنا مهما كانت ملخبطة ومتناقضة ومختلفة فهى ملك لينا ومش من حق اى حد يقرر انة يريحنا منها علشان نعيش باحساس واحد من اختيارة هوة لمجرد انة شايف انة دا افضل

ولا انتوا رايكو اية ؟؟

لية اى حاجة فى صفر بصفر

مشهد داخلى لفصل اولى اول كلاكيت عاشر مرة

الاستاذ هية يا حبيبتى الاتنين ف خمسة بكام

انا بعشرة يا استاذ

الاستاذ برافوو عليكى

مانتى شاطرة اهو طيب والتلاتة ف سبعة

انا ب 21 طبعا

الاستاذ دانتى جينيس

طيب وال5 فى صفر

انا بخمسة

يا بنتى حرام عليكى هاتموتنى بالذبحة يا بنتى اى حاجة ف صفر بصفر مفهوم ياعنى حافظة الجدول كلة جت على اسهل قانون

اى حاجة ف صفر يصفر دانا هاصفر ف ايديك عشان تقوليها

الصراحة الراجل كان عندة حق لانى كنت هاشلة فعلا

المهم منعا للمشاكل طبعا وخوفا على الاستاذ لا اكتر والله حفظت ان اى حاجة ف صفر بصفر

عادى بقى ال يعنى احنا فاهمين لية او ازاى مش مهم بجملة

مع انى بحترم جدول الضرب جدا

لان قوانينة فيها زكاء وتشغيل مخ ايام ما كان لسة فية مخ

لان ارقامة ديما ف زيادة ومسألة دايما بتكبر كل ما تزود رقم غير القسمة والطرح والكلام اللى مش ولا بد دا

بس دايما مشكلتى كانت مع الصفر ازاى اضرب رقم لية كيان ووزن ووجود ورونق (حلوة رونق دى ) فى صفر ويطلع الناتج صفر يانهار ملامحة قليلة لا دا مالوش ملامح خالص ازاى اى رقم يرضاها على نفسة اصلا بجد والله مش تهيس

5352323568555*0= 0 ويالا العار

زمنكوا بتقولوا البت دى هبلة والله او متعقدة من الرياضة لا والله دا انا حتى كنت علمى علمك قصدى علمى علوم

بس اصل انااكتشفت ان القانون دا زى قانون حياتنا الغريب اللى عايشين بية دلوقت

انسان كويس فى انسان وحش = انسان وحش

طالب مجتهد فى طالب كوسة = طالب كوسة طبعا وباللحمة كمان

سبعين مليون فى سيادتة = تعديل الدستور لابن جنابة اطال الله بقائهم واخد السبعين مليون

قصة حب حلوة فيها احلى واجمل وارق المشاعر وزكريات نقية جميلة تنقى ماية النيل من الانتاميبيا اللى فيها وللاسف يطلع طرف منهم صفر فيتحول الناتج برضو لصفر وتتنسى الذكريات الجميلة وتتمحى من زاكرة الاتنين وبرضو البركة ف الصفر

هو مش صفر بس جبااااااااااااااااااار

قادر يحول الناتج دايما لصالحة ويدوس بجزمتة على رقبة كل الارقام دى والسبب قانون رياضى ولا مش رياضى معدتش فارقة المهم ان هو الكسبان زى ما كل الاصفار ف حياتنا كسبانة

عايز تبقى الكسبان والناتج دايما يحمل اسمك وتؤش زى ملك الكوتشينة يبقى لازم تبقى صفر يا صاحبى والا فالتتحمل النتيجة وترى بعيون دامعة ارتفاع راية الصفر مع تصفيق حاد من الجمهور بس خد ف بالك هما مش بيصقفوا لية لا يا عبيط دول بيصقفوا على خبتك وغباءك لان كان ممكن تبقى صفر وتكسب وبغباءك قلت لا انا جددددددددع

مش مهم اهو كلة تهيس يالا ياكش تولع صفر اية وبتاع اية بلا هم

وغدا يوم اخر

او

صفر اخر